ماريا - بنت الكويت

Sunday, July 17, 2005

أكره مديرتي اللعينة


نعم, أكره مديرتي بالدوام, والسبب إنها لعينة وظالمة, مو بس معاي, لكن مع الكل, طبعا مديرنا السابق كان نفس الشيء, لكنه ماكان بمستوى لعانة هذي النسرة, اللي تتصرف وكأن الإدارة ملك لها, وحاطة لها شلة صغيرة حواليها من نوعية "تمام يافندم", ومشغلتهم جواسيس علي وعلى باقي الموظفين

إقترحت علي باقي الزملاء والزميلات إننا نأجر صعايدة يصيدونها وهي بموقف السيارات اللي عند الدوام, ويكفخونها, بس قالوا لي هذي الفكرة مو عملية, يمكن يفتنون علينا لي صادوهم

أبي فزعتكم يا أصحاب المدونات, عطوني حل

Tuesday, July 12, 2005

ليش الناس تستغرب من إسمي؟

ببداية إستخدامي للإنترنت, كنت مثل الكثير من الناس استخدم الأي أر سي, أو الدردشة الكتابية, وتعرفت على الكثير من الزميلات والزملاء, ولما كانوا يسألوني عن إسمي, كنت بكل صراحة وعفوية أقول لهم إسمي الحقيقي, وهو: ماريا
إهني يبدا الإستغراب, وفي بعض الاحيان التعليقات المضحكة, مثل: شنو إنتي مكسيكية؟ شتصيرلج روزاليتا أو غونزالوس؟
فأظطر أشرحلهم بأن إسم ماريا مقتبس من إسم زوجة الرسول (ص) ماريا القبطية, وهو إسم مو دارج عندنا بالكويت, ومو أنا إللي إخترتة لنفسي, وإني مرتاحة ومو متعقدة من هذا الإسم, صارت هذي الإسطوانة اللي أكررها لما حفظتها صم, وقمت أكتبها وأنا مغمضة

إللي خلاني أكتب هذا البوست هو بومريوم (الله يسامحه), أمس لأول مرة أعلق بالمدونة مالته, قال لي: شتصيرلج وضحة الامريكية ؟

Monday, July 11, 2005

أول تجربة لي بعالم المدونات

السلام عليكم
هذي أول تجربة لي, وإنشاء الله ما تكون الأخيرة, بالرغم من إني أزور بعض المدونات بصورة شبه دورية, لكني كنت أفضل إني اكون قارئة فقط, من غير ما أكتب ملاحظاتي, حتى لو كان فيه إمكانية إني أكتب بمعرف الأنونيموس

لكن مثل مايقولون: سونر أور ليتر, الوحدة فينا تحب تكون لها مدونتها الخاصة, واللي تكتب فيها خواطرها وأرائها

ولهذا السبب, ولاسباب اخرى, راح اشرحها لما الوقت يسمح, قررت أنشئ هذي المدونة